ပုံပြင်မဟုတ်တဲ့ တကယ့်ဘဝတွေ (အပိုင်း-၂-ဇာတ်သိမ်း)

ပုံပြင်မဟုတ်တဲ့ တကယ့်ဘဝတွေ ပိုစ့်ရဲ့ အဆက်ပါ။
ပထမပိုင်းကိုပါ..ဒီထဲ..ပြန်ဖော်ပြလိုက်ပါတယ်နော်... ။
=============
သူတပါးရဲ့ နာကျင်မှုကို မြင်ရုံနဲ့ ကိုယ်တိုင်နာကျင်သလို ခံစားတတ်တဲ့ စိတ်နှလုံးဟာ အခုအချိန်မှာမှ ရှိလာတာ မဟုတ်ပါဘူး။
မောင်သူရ ရဲ့ စိတ်နှလုံးက ငယ်စဉ်ကတည်းက
သူတပါး ရဲ့ နာကျင်မှုတွေကို
ကိုယ်နဲ့ ထပ်တူထပ်မျှ ခံစားမိခဲ့တာပါ။
မောင်သူရ အသက် ဆယ်နှစ်အရွယ်လောက်က တခြားမိသားစုတစ်စုရဲ့ ဆင်းရဲမွဲတေမှုကို ကြည့်ပြီး
မျက်ရည်တောက်တောက်ကျမိခဲ့ဖူးတာလေး ပြန်ပြောပြချင်ပါသေးတယ် ။
**********
အဲဒီတုန်းက . . .
မောင်သူရ အသက်က ဆယ်နှစ်လောက်ပဲရှိဦးမယ် ။
မောင်သူရရဲ့ မေမေက တောင်ဒဂုံ / လေးဒေါင့်ကန်ရွာဘက်မှာ မြေကွက်လေးတစ်ကွက် ဝယ်ပြီး
ပျဉ်ထောင် သွပ်မိုး အိမ်ကလေးတစ်လုံး ဆောက်ထားတာ ။
ဘယ်သူမှလည်း မနေသေးတော့ အိမ်ကို သော့လေးခတ်ပြီး ဒီအတိုင်းပဲ ပိတ်ထားတာပေါ့ဗျာ။
အဲဒီအိမ်နဲ့ ခြံလေးကို တစ်နှစ်ကျော်လောက် ပစ်ထားမိတာက စတော့တာပါပဲ။
မေမေက မောင်သူရကို လက်ဆွဲပြီး ပစ်ထားတာကြာပြီဖြစ်တဲ့ အိမ်ကလေး သွားကြည့်ဦးမှ ဆိုပြီး ခေါ်သွားတာ. . . .
ဟိုရောက်တော့. . .
အိမ်က သောကြီး ပွင့်လျက်သား…
အိမ်ပေါ်မှာလည်း မိသားတစ်စုက . . .
အခန့်သား. . . တက်နေပြီ ။
သော့ကို ဖျက်ပြီး ဝင်နေတာပေါ့လေ။
ခြံက စည်းရိုးအခိုင်အမာမရှိတော့ ဝင် နေဖို့က မခက်ဘူးပေါ့။
ဒါပေမယ့် အိမ်ရှင်ဖြစ်တဲ့ ကိုယ်တွေကို အသိမပေးပဲ တက်နေတာကတော့ လွန်တာပေါ့ ။
မိုက်ရိုင်းလိုက်လေခြင်း ဆိုပြီး မေမေက ရှင်းမယ်. . . ပေါ့။
ဒေါနဲ့မောနဲ့ အိမ်ပေါ်တက်. . .
ခါးကိုထောက်ပြီး ရန်တွေ့ဖို့ နှင်ချဖို့အလုပ်. . . . .
မောင်သူရရဲ့မေမေလေ. . .
အင်မတန် အားနာတတ်သော
အင်မတန်မှ သနားလွယ်တတ်သော . . .မေမေ . . .
ရန်တွေ့ ဖို့ ပြင်နေတဲ့ စကားလုံးတွေကို ဘရိတ်အုပ်ပြီး
ရန်မတွေ့ ရက်တော့ပဲ ငြိမ်သွားတာဗျ ။
ငြိမ်သွားမှာပေါ့. . .
မြင်လိုက်ရတဲ့ မြင်ကွင်းက ကြည့်ရက်စရာမှ မရှိတာ ။
**************
ပိန်ချုံးနေတဲ့ ကလေးငယ်သုံးယောက် . . .
ညစ်ထေး စုတ်ပြတ် နေတဲ့ အဝတ်အစားများ. . .
ကလေးတွေရဲ့ အမေဖြစ်ပုံရတဲ့…
မွဲခြောက် ပိန်ကပ်နေတဲ့ အမျိုးသမီးတစ်ယောက်. . .
သူတို့ ရုပ်ရည်တွေကို ကြည့်ရတာကိုက . . .စိတ်မသက်သာစရာ ဖြစ်နေရတဲ့အထဲ. . .
သူတို့. . . .အနေအထားက. . .
ပိုမကြည့်ရက်စရာဖြစ်နေတယ်။
သူတို့. . . ထမင်းစားနေကြတာပါ။ ဒါပေမယ့်. . .
မည်းညစ်ညစ်ဆန် အကျိုးအကြေ(ဆန်ကွဲ)ကို ချက်ထားတဲ့ ထမင်းအိုးတစ်လုံး ဘေးမှာချထားတယ် ။
အဲဒီအိုးထဲက ထမင်းလက်တစ်ဆုပ်သာသာလောက်က အဲဒီကလေး သုံးယောက်နဲ့ အမေတစ်ယောက် စားဖို့ ဘယ်လိုမှ မလောက်နိုင်/မဝနိုင်လောက်ပါဘူး ။
နည်းနည်းလေးလေ ။
နေပါဦး. . . ဘာဟင်းလဲ??
ဟင်. . .
ဂေါ်ဖီဖက်တွေ. . .
ဒါပေမယ့် စိမ်းရင့်ရင့် . . .
ဒါဆို ဂေါ်ဖီထုတ်ရဲ့ဘေးက ခွါချထားတဲ့ အရင့်အဖက်တွေပေါ့. . .
(အဲဒီဂေါ်ဖီထုတ်ဘေးကခွါချထားတဲ့ ဂေါ်ဖီဖက်အရင့်တွေကို သူတို့သားအမိတွေဟာ ဈေးထဲက ဈေးသည်တွေ ချွေချ ပစ်ထားတဲ့အမှိုက်ထဲက ကောက်ပြီး. . . စားဖို့ ချက်ရတာတဲ့. . .)
အဲ. . . ကြော်ထားတာလည်း မဟုတ်ဘူး ။
ဆီနဲ့ပြားနဲ့ ကျကျနနကြော်ထားတာမှ မဟုတ်တာ ။
အခုဟာက ရေလုံပြုတ်ပုံစံပါပဲ။
အဲဒီဟင်းမမည်သောဟင်းနဲ့ ငရုပ်သီးမှုန့် မထည့်နိုင်လို့ ဖြူကျဲကျဲ ဖြစ်နေတဲ့ ငါးပိရည်တစ်ခွက်. . .
ကော်ပန်းကန်
ပေတူးတူးလေးတွေထဲ…အမေလုပ်သူက ထမင်းဟင်းးတွေကို အချိုးကျခွဲဝေထည့်ပေးနေတာ…
သူတို့အားလုံး ဆာလောင်ငတ်မွတ်နေတာ. . .
အသိသာကြီးပါဗျာ. . .
မောင်သူရနဲ့ မောင်သူရရဲ့မေမေလေ. . .
အဲဒီမြင်ကွင်းကို ကြည့်ပြီး. . .
ကြောင်ငေးတွေဝေသွားတာပေါ့။
ရင်ဆို့လောက်တဲ့မြင်ကွင်းကိုးးး။
ကိုယ့်အိမ်ပေါ် ခွင့်မတောင်းပဲ တက်နေတဲ့ လူတွေကို နှင်မချရက်တော့ပဲ ထမင်းဖိုးဆိုပြီး ပြန်ပေးခဲ့တဲ့အဖြစ်ဗျ . . .
အဲဒီက အပြန်မှာ. . .
”မေမေ. . .သူတို့ သနားပါတယ်နော်” ဆိုတဲ့ ဂရုဏာစကားလေးကို အသံတုန်တုန်နဲ့. . .
မေမေ့ကို မောင်သူရ ပြောဖြစ်ခဲ့တယ် ။
မေမေလည်း. . .
သူတို့ကို သနားနေတယ် ။
————————-

အဲဒါနဲ့. . . .
အဲဒီမိသားစုကို မောင်သူရရဲ့မေမေက နှင်မချတော့ပဲ. . .အိမ်စောင့်သဘောမျိုး ဖြစ်အောင် ဆိုပြီး. . . အိမ်ရဲ့ ခြေရင်းဘက်မှာ အဖီလေးဆွဲချ ဆောက်ပေးလိုက်တယ်လေ ။
နေပေါ့။
အိမ်မရှိတဲ့ သူတို့မိသားစုအဆင်ပြေပြေတော့ နေလို့ရသွားတာပေါ့။
ဒါပေမယ့် အိမ်ငှားသဘောမျိုးဖြစ်အောင် တစ်လတစ်ခါအိမ်လခပေးရမယ်ပေါ့။ အိမ်လခ ဆိုပေမယ့်လည်း စတိသဘောပါ ။ အဲဒီတုန်းက အိမ်ငှားခ ဈေးထက် ဆယ်ဆလောက် လျှော့ပြီး တောင်းတာပါ ။
ဒါတောင် ပေးနိုင်လားဆိုတော့ မပေးနိုင်ပါဘူး ။ သူတို့ဘာသာတောင် စားဖို့အနိုင်နိုင် အငတ်ငတ်အပြတ်ပြတ် ။
သနားတာနဲ့ပဲ မပေးနိုင်လည်း ရှိစေကွယ် ဆိုပြီး ဆက် ထားခဲ့တာပါ ။
နှစ်လတစ်ခါ သုံးလတစ်ခါလောက်တော့
အဲဒီ အိမ်ကို မေမေက သွားကြည့်တယ် ။
သွားကြည့်တိုင်း . . .မောင်သူရတို့ ညီအစ်ကိုကို ခေါ်သွားတာပဲ ။
အဲဒီအိမ်နားမှာက ကြာကန်ကြီးနဲ့ ဘုန်းကြီးကျောင်းဝန်းကျယ်ကြီးရယ် စေတီတော်တွေရယ် ရှိတယ် ။
မောင်သူရတို့ဟာ. . .
ဝါးရုံတောအုပ်အုပ်ဆိုင်းဆိုင်းး မန်ကျည်းပင်တန်းမှိုင်းမှိုင်းကြီးနဲ့
ကြာကန်ကြီးဘေးမှာ အေးအေးလူလူသွားထိုင်ကြတယ်။
မနက်သွား ညနေမှပြန်တာဆိုတော့ ထမင်းချိုင့်တွေပါထည့်ပြီး သားအမိတွေ အဲဒီအိမ်မှာ စားကြသောက်ကြ ကြာကန်ကြီးဘက် သွားထိုင်ကြနဲ့ အေးအေးလူလူနေပြီး ညနေမှ အခု စံပြဈေးနားက အိမ်ကလေးကို လေးဘီးကားငှားပြန်ကြတာပေါ့ ။
တစ်ခါသား. . .
အဲဒီ အိမ်ထဲမှာ ထမင်းစားနေကြတုန်း. . .
ဟို ဆင်းရဲသား ကလေးတွေက မောင်သူရတို့နဲ့ ကစားဖို့တဲ့. . .
မောင်သူရတို့ အိမ်ပေါ်ထိ ပြေးတက်လာပြီး ခေါ်တာ . . .
မောင်သူရတို့က . . . ပါလာတဲ့ထမင်းချိုင့်တွေ ဖွင့်ပြီးစားနေချိန်. . .
မောင်သူရတို့. . .စားနေတဲ့ ထမင်းချိုင့်ထဲက ထမင်းဟင်းတွေကို အဲဒီကလေးသုံးယောက်က တွေတွေကြီး စိုက်ကြည့်ပြီး. . .
တံတွေးမျိုချနေကြတာာာာဗျ. . .
သူတို့. . .သူတို့. . .
ဗိုက်ဆာနေကြတယ်ထင်တယ်။
မောင်သူရရဲ့ မေမေက. . .
”သားတို့. . .လာ . . .ထမင်းစားသွား” ဆိုပြီး . . .ခေါ်လိုက်တော့. . . ခေါင်းလေးတွေခါ. . .
ပြန်ဆင်းပြေးသွားပြီး . . .
အိမ်ရဲ့ ခြေရင်းက
သူတို့ အဖီလေးထဲ ဝင်သွားရော. . . .
ဒါပေမယ့်. . .
သူတို့ အမေကို ပြောလိုက်တဲ့အသံလေးတစ်ခု မောင်သူရတို့ ကြားလိုက်ရတယ်။
” အမေ. . .ဟိုအိမ်ရှင်အန်တီတို့ စားနေတဲ့ ထမင်းရှည်ရှည်ကြီးတွေနဲ့. . .အဲဒီလိုဟင်းတွေစားချင်တယ်”တဲ့
ပေါ်ဆန်းမွှေးကို ထမင်းရှည်ရှည်တဲ့။
အင်းလေ . . .ပေါ်ဆန်းမွှေးထမင်းနဲ့ ဖွယ်ဖွယ်ရာရာ ဆီပြန်ဟင်းတွေကို သူတို့လေးတွေ စားချင်ရှာမှာပေါ့။
သူတို့ဘဝမှာ ငါးပိရည်နဲ့ ဆန်ကွဲထမင်းကိုတောင် နပ်မှန်ဖို့အနိုင်နိုင်နဲ့ အသက်ဆက်နေရတာကိုး။
အဲဒီ စကားသံလေးကြားတော့. .
မောင်သူရရဲ့ မေမေက ချက်ချင်းပဲ. . .
မောင်သူရတို့စားလက်စ ချိုင့်ထဲက . . . ထမင်းနဲ့ ဟင်းတွေကို ခွဲဝေပြီး သူတို့ကို သွားကျွေးလိုက်တယ် ။
စားကြကွယ်။
မောင်သူရတို့မေမေက ”ကုသိုလ်ရပြီ သားတို့ရေ ” လို့ ပြောပြီး ဝမ်းနည်းဝမ်းသာတွေ ဖြစ်လို့. . .
နောက်တစ်နေ့ကျတော့. . .
အဲဒီမိသားစု စားဖို့ဆိုပြီး
ပေါ်ဆန်းမွှေးဆန်တစ်အိတ် . . .
မောင်သူရတို့မေမေက ဝယ်ပေးခဲ့တယ် ။
ဒါနတစ်မျိုးပေါ့ဗျာ။
တကယ်လိုအပ်နေတဲ့နေရာတစ်ခုကို ကွက်လပ်ကလေးဖြည့်ခဲ့ဖူးတယ်ပေါ့။
————-
အဲဒီမိသားစုကို . .
(၂)နှစ်လောက် . . .အဲဒီအိမ်လေးမှာ ပေးနေခဲ့ပါတယ်။
တတ်နိုင်သလောက်လည်း ကျွေးမွေးပေးကမ်းခဲ့ပါတယ် ။
တစ်ချိန်မှာတော့. . .မောင်သူရတို့လက်ရှိနေ နေတဲ့ သင်္ကန်းကျွန်း/စံပြဈေးနားက အိမ်ကို ရောင်းလိုက်ချိန်မှာတော့ အဲဒီလေးဒေါင့်ကန်က အိမ်ကလေးဆီမှာ သွားနေကြစို့ဆိုပြီး. . .
ပြောင်းရွှေ့ဖို့ လုပ်ကြတယ်။
မောင်သူရတို့မိသားစု ကိုယ့်အိမ်ကိုယ် လာနေတော့မယ် ဆိုတော့. . .
ဟိုမိသားစုကို
”မင်းတို့ အဆင်ပြေမယ့်နေရာ ပြောင်းကြပေတော့ကွယ် ” လို့ မတတ်သာလို့ ခပ်ခွါခွါနေခိုင်းခဲ့ရပါတော့တယ်။
အဲဒီမှာ ပြဿနာက တက်တော့တာပဲ ။
အဲဒီဆင်းရဲသားမိသားစု ကို သနားလို့ အိမ်ပေါ်ခေါ်တင်ထားရတာ ငါးပါးမှောက်တာပဲ ။
အဲဒီ အမျိုးသမီးနာမည်က မတင်ဝင်းတဲ့။ သူ့ ကလေး တွေရဲ့ နာမည်လေးတွေကိုတော့ မောင်သူရတို့ မမှတ်မိတော့ဘူး။
ပြဿနာက. . .
သနားလို့ အိမ်ပေါ်ခေါ်တင်ထားတဲ့ မတင်ဝင်းတို့ မိသားစုက. . .
” ဒီအိမ်ပေါ်က မဆင်းနိုင်ဘူး” တဲ့။
. . . . .
. . . . .
. . . . .
. . . . .
(နောက်တစ်ပိုင်းမှာ ဆက်ရေးပါဦးမယ်)
လေးစားစွာဖြင့်. . .
အလင်းဆက်(Gazette)


—————————————

(ဒုတိယအပိုင်း)

မောင်သူရတို့က သနားလို့ အိမ်ပေါ်ခေါ်တင်ထားတဲ့ မိသားစု . . .
အချိန်တန်လို့ ဆင်းပါတော့ဆိုတော့
” ဆင်းမပေးနိုင်ဘူး ”တဲ့။

—————–

အိမ်လခလည်း မရတဲ့အပြင်. . .
ပေးကမ်းကြည့်ရှုခဲ့သေးတဲ့ မျက်နှာကိုမှမထောက်ထားပဲ. . .
အဲဒီ မိန်းမက ”ဆင်းမပေးနိုင်ဘူး” လို့ ပြောပါလေရော ။

အဲဒီတော့ မောင်သူရရဲ့ မေမေက စိတ်ဆိုးပြီပေါ့။
မောင်သူရတို့မိသားစုကလည်း အဲဒီ အိမ်မှာ နေမှကို ဖြစ်တော့မှာဆိုတော့. . .ဒီထက် ပို အားမနာနိုင်တော့ဘူးလေ။
ကိုယ်တွေက အိမ်ရှင်ဖြစ်ပြီး သနားလို့ ခေါ်တင်ထားတဲ့လူတွေက . . .ဆင်းမပေးနိုင်ဘူးဆိုတိုင်း ငြိမ်နေလို့မှ မရတော့တာ ။

သူတို့က. . .
” ဒီအိမ်မှာနေလာတာ သုံးနှစ်သုံးမိုးရှိပြီ ။ ကျုပ်တို့အိမ် ဖြစ်နေပြီ” ဆိုပြီး. . .အပိုင်စီးတာဗျို့ ။

ပညာမရှိ အသိဥာဏ် မစွမ်းတဲ့လူတွေဆိုတော့. . .ဆင်ခြင်စွမ်းမဲ့စွာ တရားလက်လွတ်ပြောကြတာ။
သူတို့ ဘယ်လောက်ပဲ အပိုင်စီးချင်နေပါစေဦး ။
ဒီအိမ် ဒီခြံနဲ့ပတ်သက်သမျှ စာချုပ်စာတမ်းတွေ / ပိုင်ဆိုင်မှုပြစရာတွေက မောင်သူရတို့ မေမေ လက်ထဲမှာပဲလေ ။ ကိုယ့်အိမ်အသေအချာပဲမို့ ဘယ်လို ရင်ဆိုင်ပါစေ ကိုယ်ပဲနိုင်ရမှာပေါ့ ။

ဒါလောက်လေးကိုတောင် သူတို့မတွေးနိုင်ဘူး ။ ဒီတော့. . .ရပ်ကွက်လူကြီးကို ခေါ်ရှင်းရုံပေါ့။

———————————

အဲဒီမိန်းမအကြောင်း
ပြောပြပါရစေ။
နာမည်က မတင်ဝင်းတဲ့ ။
လေးဒေါင့်ကန်ရွာရဲ့ မနက်ဈေးကလေးထဲမှာ ဈေးသည်ဈေးဝယ်တွေကို သောက်ရေ ခပ်ပြီးရောင်းစားတာ။
အဲဒီတုန်းက တစ်ခွက်ကိုတစ်ကျပ်ပေါ့ ။
ဈေးသည်တွေကလည်း သူတို့မိသားစုကို သနားတာနဲ့ ရေကို သောက်ကြပါတယ်။ တစ်ကျပ်စီလည်း မတွန့်မတိုပေးကြပါတယ် ။
အဲဒီမိန်းမက ကလေးတွဲလောင်းနဲ့ ရေရောင်းပြီး ရတဲ့ ပိုက်ဆံကို သူ့ ယောကျာ်း အရက်သမားအတွက် . . .
အရက် ဆက်သရတယ်။
ရေကိုရောင်းပြီး အရက်ဝယ်တယ်ပေါ့ဗျာ ။

အဲဒီ အရက်ဖိုး ပိုမှ သားအမိတွေစားဖို့ . . .ဆန်ကွဲထမင်းအနိုင်နိုင် ဝယ်ရ/
ချက်ရ/ဟင်းကတော့ ထုံးစံအတိုင်း . . .ဈေးထဲက ဟိုကောက် ဒီကောက် / ဟိုဈေးသည် ဒီဈေးသည်က ပေးကမ်းစွန့်ကြဲတာလေးတွေကို ပြုတ်သလို ချက်စားရတာ။

အဲဒီ ဆင်းရဲမွဲတေမှုတွေကို သနားလို့ တတ်နိုင်သလောက် ပေးကမ်းစောင့်ရှောက်ခဲ့တာ သုံးနှစ်သုံးမိုး . . .ကို. . .

အဲဒီမျက်နှာကိုမှ သူတို့ မထောက်ထားကြဘဲ အိမ်ပေါ်က. . .ဆင်းမပေးနိုင်ဘူးဆိုပြီး. . . သူ့ယောကျာ်း အမူးသမားနဲ့ ပေါင်းပြီး အိမ်ရှင်ကို ပြန်ချဲတာ။

မိုက်ရူးရဲတွေ. . .
မောင်သူရရဲ့ မေမေက အရမ်းစိတ်ကုန်သွားပြီး (ဒေါသကလည်း ထွက်တာပေါ့) အခုချက်ချင်း ဆင်း ဆိုပြီး နှင်ချပါလေရော . . .ရပ်ကွက်လူကြီးတွေကိုပါ ခေါ်ပြီး ချက်ချင်းရှင်းတာ. . .

ရပ်ကွက်လူကြီးက မောင်သူရရဲ့မေမေကို ကြားကနေတောင်းပန်တယ်။
ငါးရက်လောက် အချိန်ပေးပါပေါ့။
ငါးရက်အတွင်း သူတို့ ဖယ်ပေးအောင် ဖြေရှင်းပေးမယ်ဆိုပြီး ညှိပေးတယ်။
အိုကေလေ ။ ကောင်းပြီ ။

အဲဒီ ငါးရက်မြောက်တဲ့နေ့မှာ မောင်သူရကို လက်ဆွဲပြီး. . .
ဆင်း/ မဆင်း သွားကြည့်တယ်။

အင်းးးး
မောင်သူရနဲ့ မေမေ အဲဒီကို ရောက်လာတော့မှ အထုပ်အပိုးလေးကောက်ပြင်ပြီး ဆင်းသွားလေရဲ့ ။

ဒါပေမယ့်. . . .

———————————-

အဲဒီနေ့က မတင်ဝင်းတို့ မိသားစု မောင်သူရတို့ရဲ့ အိမ်ပေါ်က ဆင်းတော့ ဆင်းသွားပါတယ်။ ဒါပေမယ့် အဲဒီ မတင်ဝင်းက အဲဒီအချိန်မှာ ကိုယ်ဝန်အရင့်အမာကြီးနဲ့ ။

မောင်သူရရဲ့မေမေက သနားလည်း သနားတတ်တယ်။
စိတ်လည်း ကြီးတယ်။ သူ့ ကို ကြောသလိုမောသလို လာလုပ်ရင်တော့ မရဘူး ။
ဒါပေမယ့်. . .ဒေါသနဲ့ ဆင်းခိုင်းလိုက်ပေမယ့်. . .
ဗိုက်ကြီးတကားကားနဲ့ မတင်ဝင်း ဆင်းသွားရတာကိုကြည့်ပြီး သနားကျန်ရစ်ပြန်ရော. . .

နေ့စေ့လစေ့ကြီးနဲ့တူပါရဲ့
ကလေးမွေးပြီးတဲ့အထိ ပြန်ခေါ်ထားမှနဲ့တူပါရဲ့. . .ဆိုပြီး
ပြောကျန်ရစ်တာ ။

မောင်သူရတို့ မေမေရဲ့ အမျိုးအဆွေတွေက . . .”ဇာတ်လမ်း ထပ်အရှုပ်မခံနဲ့တော့” ဆိုပြီး ဝိုင်းပြောလို့. . .

ဒါနဲ့ပဲ. . . .
သူတို့ ဘဝနဲ့ သူတို့ ရှိပါစေတော့ပေါ့ ။

သနားလျက်နဲ့ ရက်စက်သလို လုပ်ခဲ့ရတဲ့ အဖြစ်ပေါ့ဗျာ ။

—————–

ဗိုက်ကြီးနေ့စေ့လစေ့နဲ့ ဆင်းသွားတဲ့ အဲဒီ မြင်ကွင်းကို မောင်သူရတို့ တော်တော်နဲ့ မမေ့နိုင်ခဲ့ဘူး ။

သနားစိတ်နဲ့ . . .သူတို့ အဆင်မှပြေကြရဲ့လားဆိုပြီး ပူပန်နေခဲ့ကြပါသေးတယ်။

———————

တစ်နေ့မှာတော့. . . .

———————

”ဝဋ်လည်တာ” လို့ မောင်သူရရဲ့မေမေက တတွတ်တွတ် ရေရွတ်နေမိတဲ့အဖြစ်တစ်ခု ဖြစ်လာတယ် ။

ဘဝတစ်ကွေ့ မှာ. . .
မောင်သူရတို့ကိုယ်တိုင် အိမ်ငှားနေရတဲ့ ဘဝ ရောက်လာပါတယ် ။

အိမ်တစ်အိမ်ကို ငှားခဲ့ပါတယ်။
အဲဒီမှာ အိမ်ရှင်နဲ့လည်း ရင်နှီးပြီးသားဆိုတော့ အိမ်ရှင် အိမ်ငှား စာချုပ်ကို အေးအေးဆေးဆေးမှ ချုပ်မယ်ပေါ့ ဆိုပြီး လောလောဆယ် ငှားတဲ့အိမ်ပေါ်တက်နေ ဆိုလို့ နေ နေလိုက်တာ ။

နေလို့မှ တစ်ရက် နှစ်ရက်ပဲ ရှိသေးတယ် ။
ငှားမိတဲ့ အိမ်ရှင်ရဲ့ အမေဆိုတဲ့ အဖွားကြီးက လာ နှင်ချပါလေရော ။

မောင်သူရတို့မှာ တောထဲတောင်ထဲ ချက်ချင်းပဲ အထုပ်ဆွဲပြီး ပြေးရမလိုပဲ ။

ဒီအိမ်ကို မောင်သူရတို့ကို ငှားလိုက်တဲ့ အိမ်ရှင်အမျိုးသမီးရဲ့ အမေတဲ့ဗျာ ။ အဲဒီ အဖွားကြီးက သူ့ကို အသိမပေးပဲ ငှားထားရပါ့မလား။ ဒီအိမ်ပေါ်တက်
နေရပါ့မလားဆိုပြီး ပြဿနာ ရှာတာ ဝက်ဝက်ကိုကွဲရော ။
အဖွားကြီးရဲ့ သဘောက ဒီအိမ်ကို ဘယ်သူ့ကိုမှ လခနဲ့ မငှားနိုင်ဘူး တဲ့ ။
သူ မသိပဲ ငှားတဲ့ သူ့သမီးဖြစ်သူကိုလည်း ပြဿနာရှာတဲ့အပြင်
အခပေးပြီး တက်နေမိတဲ့ မောင်သူရတို့ကလည်း ငါးရက်အတွင်း ပြန် ပြောင်းပေးရမယ် တဲ့လေ ။

မောင်သူရတို့ ဘာကို သွားသတိရလဲဆိုတော့. . . .လွန်ခဲ့တဲ့
ဆယ်နှစ်လောက်က မတင်ဝင်းတို့မိသားစုကို နှင်ချခဲ့မိတဲ့အဖြစ်/အဲဒီတုန်းက မြင်ကွင်းလေးကို ပြန်မြင်ယောင်သွားကြတာဗျို့ ။

အော်. . . . ဒါဟာ တစ်ပတ်ပြန် လည်ခြင်းများလား ပေါ့။
မေမေပြောသလို ဝဋ်များ လည်တာလားပေါ့ ။

———

အိမ်ရှင်အိမ်ငှား ထုံးစံအရ. . .
မနေနိုင်တဲ့ အိမ်ငှားဘက်ကဖြစ်စေ / ဆက်မထားနိုင်တဲ့ အိမ်ရှင်ဘက်ကဖြစ်စေ တစ်လ ကြို ပြောရမယ်ဆိုတဲ့ သတ်မှတ်ချက်လေးနဲ့ပဲ မောင်သူရတို့ အယူခံ ဝင်ကြရတယ် ။
တစ်လလောက် နေပြီး နောက်တစ်အိမ်ပြောင်းဖို့ ရှာကြံရဦးမှာကိုး ။
နောက်တစ်အိမ်ရှာဖို့ဆိုတာက တစ်လလောက် အချိန်ယူမှ ဖြစ်မှာလေ ။
သဘော မတူချင်ပေမယ့်
သူတို့ဘက်က လျှော့ပေးရှာပါတယ်။
တစ်လအတွင်း ပြန် ပြောင်းနိုင်ဖို့ကြိုးစားခွင့်တော့ မောင်သူရတို့ ရလိုက်ပါတယ်။

ဒါပေမယ့် နောက်ဆယ်ရက်လောက်မှာပဲ အိမ်အသစ်တစ်လုံး ငှားလို့ရသွားပါတယ် ။
ငှားလို့ ရတာနဲ့ လက်ရှိ အိမ်ပေါ်ကနေ ချက်ချင်း ဆင်းပေးလိုက်ပါတယ် ။

အဲဒီရက်တွေမှာ . . . မိသားစု ခုနှစ်ယောက်ရှိတဲ့ မောင်သူရတို့ မိသားစုကြီးဟာ ဆယ့်ငါးရက်လောက်အတွင်းမှာ အထုပ်အပိုးတွေ အိုးတွေခွက်တွေ ပလုံစီပြီး
ဟိုရွှေ့ ရ ဒီပြောင်းရနဲ့ တော်တော်လေးတော့ ဒုက္ခရောက်သွားပါတယ် ။

မငှားနိုင်ဘူး။ ဆင်းပေးပါ ဆိုတဲ့ အိမ်ရှင်ကို . . .
နေသွားခဲ့တဲ့ ဆယ့်ငါးရက်စာ အိမ်လခလေး သွားပေးပြီးတော့. . .
မောင်သူရကြီး အတွေးတစ်ခု တွေးမိသွားတာပါ။

အော်. . .ကြွေးဟောင်းတစ်ခုတော့ ဆပ်လိုက်နိုင်ပြီ လို့. . .
နောက်ထပ် ဘယ်လိုကြွေးသစ်မျိုးမှ
ထပ် မယူချင်တော့ပါဘူး လို့. . .

အဲဒါလေး တွေးမိတာ. . .

———————

လေးစားစွာဖြင့် . . .

အလင်းဆက်(Gazette)