ဇာတ်လမ်းသစ် – အမိကောင်းကင်

.တောအထပ်ထပ် တောင်အသွယ်သွယ်ကို ဖြတ်ပြီး ကိုယ် လာခဲ့သည်။
ကိုယ်၏ ခြေဦး တည်ရာသည်ကား
ချင်းတောင်တန်းတနေရာ။
ကိုယ်၏ ချစ်သူရှိရာ မြူတွေရစ်ဆိုင်းနေသည့် ချင်းတောင်တန်းမြေပေါ်သို့ ဆွေးမြေ့လွမ်းလျသော တမ်းတစိတ်တို့ဖြင့် ကိုယ် လာခဲ့ပြီ။
ကိုယ့်ချစ်သူသည်
''အမိကောင်းကင် ကြယ်စင်မောင်နှမ'' နာမည်ဖြင့် အများသိကြသော ဇာတ်လမ်းထဲမှ စေတနာ့ဝန်ထမ်း ဆရာမလေးသာဖြစ်သည်။
ကိုယ့်ချစ်သူသည် ရုပ်ရှင်မင်းသမီး သက်မွန်မြင့်နှင့် နည်းနည်းကလေးမှ မလွဲ တထေရာတည်းဖြစ်သည်။
ဟိုအချိန်တခါကဖြင့် ကိုယ့်ချစ်သူရှိရာ တောင်ပေါ်ဒေသသို့
ကိုယ် သွားရောက် ခေါ်ငင်ခဲ့ဖူးသည်။
ထိုစဉ်ကတော့ ကိုယ့်ချစ်သူလေးခမျာ တောင်ပေါ်ဒေသမှ လူမည်ခွင့် အပြည့်အဝ မရရှာသော လူမမည်ကလေးများ၏ ဘဝများကို သနားလွန်း၍ဆိုကာ
သူမဘဝကို ကလေးများအတွက် မြှုပ်နှံပစ်တော့မည်ဟု ဆုံးဖြတ်ကာ နေရစ်ခဲ့သည်။

 https://youtu.be/MioVlHvlYds

1. မီးအိမ်ရှင် MP3 - တေးဆို ထွန်းထွန်း

နှစ်အနည်းငယ်ကြာအပြီးမှာတော့ ကိုယ့်ချစ်သူထံမှ စာကလေးတစ်စောင် ကိုယ့်ထံရောက်ခဲ့သည်။

ထိုစာထဲ ရေးထားသမျှထဲတွင်. . .တောင်ပေါ်ဒေသ တိုးတက်လာလိမ့်နိုးဖြင့် အားကြိုးမာန်တက်ခဲ့ပါသော်လည်း ပြောင်းလဲတိုးတက်နေပါပြီဆိုသော သတင်းများသာ ကြားရပြီး လက်တွေ့မှာတော့ ဘာမျှပင် ထူးမလာ ခြားမလာကြောင်း. . .
ဟိုးအရင်က တောင်ပေါ်ဒေသ ခေါင်ခိုက်ခိုက်နှင့် ယခုလက်ရှိ ဒီမိုကရေစီ အနှစ်သာရ စားသုံးနေရပါပြီဆိုသောခေတ်၏ တောင်ပေါ်ဒေသသည် ဘာမျှ ထူးပြီး ကောင်းမလာ။
ဤဒေသများတွင် မသေသင့်သော ရောဂါကလေးများဖြင့် သေမြဲသေကြဆဲ. . .
မစားသင့်သော အစားအစာများကို ရွေးချယ်ခွင့်မရှိဘဲ စား၊ မပြောချင်သောစကားများကို မပြောချင်ဘဲပြော၊  မလုပ်ချင်သော အလုပ်များကို မလုပ်ချင်ဘဲ လုပ်ရင်း မဖြစ်သင့်သော ဘဝအနေအထားများဖြင့် မနေချင်ဘဲ နေ နေရမြဲပင်ဖြစ်ကြောင်း. . .
တိုးတက်ကောင်းမွန်နေပါပြီဆိုသော စကားလုံးများသည် စကားလုံးများသာဖြစ်၍ တကယ်တော့ ဘာတစ်ခုမျှ အသုံးမဝင်ကြောင်း. . .
အားမာန်အပြည့်ရှိခဲ့သမျှ သဲထဲ ရေသွန်နေရဖန် များပြီမို့ ဆက်သွန်စရာ ရေလည်း ခန်းခဲ့ပြီဖြစ်ကြောင်း . . .
ထို့ကြောင့် ဆက်လက်ကာ အပုပ်နံ့ကို ခံနေလျှင်ဖြင့် လင်းတဆန်ရုံအပြင် ထူးမလာနိုင်ကြောင်း သိလိုက်ပါပြီ. . .ဟု စာဖွဲ့ ရင်ဖွင့်ထားလေသည်။

ထိုစာ၏ အသွားအလာအရ ကိုယ့်ချစ်သူသည် ကြိုးစားသမျှ အရာမထင်သည့် ဗလာရင်ခွင်ဒေသမှာ ဆက်လက်ကာ မပျော်မွေ့တော့သည်ကို ခန့်မှန်းမိပါသည်။
ကိုယ်ကလည်း ကိုယ့်ချစ်သူမှလွဲလျှင် တထေရာတည်းတူပါသော သက်မွန်မြင့်ကိုတောင် အစားမထိုးချင်သူ။
ချစ်ဦးသူ မိန်းမချောလေးအား နှမြောတသစိတ်တို့ဖြင့် အလွမ်းသံသရာမြစ်ကြောဝယ် ကူးဟယ်ခတ်ဟယ် မမောဘဲ တမျောထဲမျောနေရသည်မှာ ဒီနေ့အထိ။
ချစ်သူ၏ ''ဗလာတိုင်း''တွင် တစ်ခါမဆိုင်းချင်တော့ပါဘုဟူသည့် သဘောပိုက်ကာရေးပါသည့် စာလွှာပုရပိုက်ကို ဖတ်ရှုရသော တခဏမှာဖြင့် ကိုယ့်ရင်အတွင်းမှာ မြစ်တစ်စင်း ပင်လယ်နှင့် ပူးပေါင်းကာ ထကသည့်အလား ဝုန်းဒိုင်းကြီးကြဲလျက် အပျော်ကြီးပျော်
အမြူးကြီး မြူးရသည်။
ချက်ချင်းမဆိုင်း လက်ငင်းရှိုင်းကာ ထ လိုက်လာရသည့် ဤခရီး . . . အပြန်တွင် အမှန်အကန်ချစ်ရသူကလေးနှင့် ရွှေလက်တွဲကာ ချစ်ပွဲဝင် လာရပါလိမ့်နိုး. . .

--------------------
မြူခိုးတိမ်ငွေ့တို့ဖြင့်
ရွယ်မိုး သိမ်မွေ့ပါသော ချင်းတောင်မြေသာ ဌာနေရွာ. . .
ရိုးရာပန်းများကိုသာ ပန်မြဲပန်သော ချင်းသူမလေးများ ယဉ်ပါသည်။
ရိုးရာပန်းရနံ့ကိုသာ ရှုရှိုက်ချင်သည့် ချင်းလူငယ်ကလေးများ ရိုးလွန်း၍ ''အ''မည်ပင် စိုးရ. . .
.တောင်ပေါ်တနေရာရှိ ကိုယ်၏ချစ်သူ မဒီကညာတပါး ဘယ်ကိုများ သွားပါသနည်းဟု ဝေ့ဝဲကာ ဖွေရှာမိသည့်တခဏ. . .
''ဟယ်. . . ''ကို'' ကို လိုက်လာတယ် ဟုတ်လား''
''အေးပေါ့. . . ဒီမှာ မင်းမပျော်တော့ဘူးလို့ ထင်လို့. . . ဒီတခါ ထပ် လာခေါ်တာ။ ကိုယ်နဲ့ ပြန်လိုက်ခဲ့မယ်မဟုတ်လား''
''အို. . .လာခေါ် ပြန်ပြီတဲ့လား ကိုရယ်''
''ဘာလဲ. . . ဟိုတခေါက် လာခေါ်တုန်းကလို မလိုက်ပါရစေနဲ့လို့ ငြင်းဦးမှာလားဟင်. . . တောင်ပေါ်မြေကလေးကို တိုးတက်အောင် ထောင့်လေးတစ်ထောင့်ကနေ အကျိုးသယ်ပိုးပါရစေတော့ လို့ ပြောဦးမလို့လား. . .''
''အို. . . ဟင့်အင်း  မပြောပါဘူး။ မငြင်းတော့ပါဘူး ကို. .
လာခေါ်ပြန်ပြီတဲ့လား လို့ ပြောမိတာက ...
အရင်တခေါက် ကို လာခေါ်တုန်းကသာ လိုက်ခဲ့ရရင် အခုလောက်ဆို မြို့ပေါ်မှာ သားတွေသမီးတွေနဲ့ ကိုနဲ့ညီမ မိသားစုဘဝလေး တည်ဆောက်တာ ခိုင်ခံ့နေလောက်ပြီလို့ ပြောမလို့ပါ။
အခုတော့ သဲထဲရေထိုင်သွန်နေမိတာနဲ့ ကိုနဲ့ညီမ အိမ်ထောင်ပြုဖို့တောင် နည်းနည်း နောက်ကျနေပါပေါ့လို့ ပြောမလို့ပါ ကို''

''အစမကောင်းရင် အနှောင်းမသေချာတဲ့တိုင်းပြည်မှာ
.ရေမြင့်မှ ကြာတင့်ဆိုသလို
.ရေကိုက မမြင့်ပဲ ကြာက ဘယ်လောက်တင့်ချင်လို့တုန်း။ ဒီကြာကန်ထဲနေ နေသ၍ ရွှံ့ညွန်တောက ကြာငပေါပဲ ဖြစ်တော့မပေါ့။ အခုတော့ ဘယ့်နှဲ့ရှိစ. . . သိပြီမဟုတ်လား ညီမရယ်. . .''

''သိပါပြီ ကို. . . ညီမဖြင့် ကောင်းကောင်းကြီး သိလိုက်ပါပြီ. .
ဒါကြောင့်လည်း ကိုသာ နောက်တခေါက် ထပ်လာခေါ်ရင် ဘယ်လောက် ကောင်းလိုက်မလဲလို့ မျှော်လင့်ပြီး. . .ဟောဟိုမယ်ကြည့်!! အထုပ်ကလေးတောင် အဆင်သင့် ပြင်ထားပါပကောလား ကိုရယ်...''

''အော်. . . ညီမရယ် . . .ကိုယ့်ကို အဲ့သလောက်တောင် မျှော်လင့်နေသတဲ့လား''

''ကို့ကို မျှော်လင့်နေတာရော ဟောဒီတောခေါင်ခေါင်ထဲ သူတပါးအကျိုးတောင် ဘာမှ မျှော်ကိုးလို့မရဘဲ
''အပုပ်နံ့ ခံနေတဲ့ လင်းတမ''လိုဘဝမျိုးကို အဆုံးသတ်ချင်စိတ်က တားဆီးမရတော့တာလည်း ပါတာပေါ့ ကိုရယ်။ ''

.ပြောပြောဆိုဆိုပင် ကိုယ့်ချစ်သူကလေးက အထုပ်ကလေး ပြေးဆွဲပြီး ကိုယ့်လက်ကိုတွဲကာ ခွဲထားခဲ့မှာ ကြောက်ပုံမျိုးဖြင့် တောင်တန်းပေါ်မှ ဆင်းဖို့ပြင်သည်။

.တောင်ပေါ်ဒေသသည်ကား လွန်ခဲ့သော နှစ်များ ခေတ်များတုန်းကလိုပင် တရှဲရှဲ အော်မြည်ခြင်းငှာပင် မစွမ်းတော့ဘဲ
သစ်တောတုံးလုံးဖြင့် ဝတ်လစ်စလစ် ကျန်ရစ်ခဲ့လေသည်။

----------------
Alin Z @ Maung Thura
16/04/2015/13:11